Zegama, 1935. Hamazazpi urte zituela Madrilera joan zen bizitzera eta bertan bizi izan zen jubilatu arte. Ordutik hona, Euskal Herrira itzuli eta Zegaman bizi da. Artelanen zaharberritzaile gisa aritu zen. Julio Beobide eskultorea ezagutu ostean, euskararekiko konpromisoa hartu zuen. Herbesteratua (Hordago, 1982) izan zuen lehen eleberri argitaratua. Nobela honetan, Mikel Arriaga abertzalea dugu protagonista nagusia, Madrilen bizi den euskaltzale sutsua. Urte berean, halaber, Hiltamuzko lantuak hausnarketa liburua kaleratu zuen. Ondoren argitaratu zituen Hamabost istorio Aizkorpeko (Elkar, 1984) eta Zaharrak berri (Elkar, 1985). Narrazio laburrotan ildo berari ekiten zion egileak: bere aitonari Atxateko baserrian entzundako ipuinak, gai mitologikoak jorratu zituen historia hauetan. Samur eta gordin (Elkar, 1987) izan zuen hurrengo liburua, euskal baserritarren munduan girotutako ipuin-liburua dugu.