Sortzailea, musikaria eta itzultzailea den Nahia Zubeldia izan zen hautatua Euskal kultur erakundeak, CPIE Euskal Itsasbazterrak eta Euskal Idazleen Elkarteak antolatzen duten euskal idazle egonaldiaren hamargarren edizioan. 2020ko azaroa-abendua bitartean Hendaiako Nekatoenea baserrian egon zen olerki bilduma bat lantzen.
Ekimen honen bidez euskal literatura sorkuntza sustatu nahi da eta horretarako irabazleari argitaratuko den idazketa lan batentzat behar dituen ahalak eskaintzen zaizkio leku eder bat eskainiz.
Literatura sorkuntza egonaldi horren hamargarren urtemuga ospatzeko, 2020an, Juan Sebastian Elkano euskal itsas gizon ospetsua nabarmentzeko aukera izan zen, munduko lehen itzuliaren 500 urtemugaren karietara.
Nahia Zubeldia 37 urteko ziburutarra da eta aspalditik dabil testuak idazten eta musika sortzen, besteren artean Unama eta Lumi taldeetan. Idazketa beti izan du ondoan, Bordelen hizkuntza zientzien ikasketak burutik zituen. Ondoren, Gasteizera joan zen, Euskal Herriko Unibertsitatera, eta itzulpengintza eta interpretazio lizentziatura egin zituen.
Nahia Zubeldia hilabetez egon zen Nekatoenean, Juan Sebastian Elkanoren larruan sartuz, olerki bilduma bat landu zuen itsasketaz, euskaldunon jakin minaz, mundu ezezagunen bila joatearen tiraz eta itsasoaren aurpegiez, aurpegi guziez: "ene ametsen ama eta sormenaren bazka izanik ere, bisaia ilunagoak ere baititu itsasoak. Azken urteetan, esperantzaz bete jende anitzen hilobi bilakatu da, eta uretan arrain bezainbat zikin dabil… […] Paradoxa horietan eman nahi nuke arreta, ahal bezainbat ikuspuntutik so eginez".
