‘Hegats’ aldizkaria osorik Euskaltzaindiaren webgunean

• Euskal Idazleen Elkartearen (EIE) Hegats literatur aldizkaria osorik kontsultatu ahal izango da aurrerantzean Euskaltzaindiaren webgunean, www.euskaltzaindia.eus/hegats helbidean.

• 1989an argitaratu zen lehen zenbakitik 2026ko azkenera arte, aldizkariaren 53 zenbakiak eta 670 artikulu baino gehiago daude orain edonoren eskura, doan eta sarean: bakoitza bere azalarekin, argitalpen-datarekin eta aurkibidearekin, eta PDF formatuan osorik irakurtzeko eta deskargatzeko moduan.

• Bildumaren berrikuntza nagusietako bat egileen aurkibidea da. Bertan Hegats-en idatzi edo itzuli duten 328 pertsonak ageri dira, alfabetikoki ordenatuta eta bakoitzak argitaratutako lan kopuruarekin.

Euskal Idazleen Elkarteak (EIE) eta Euskararen Akademiak lankidetza-hitzarmena sinatu dute aurten, otsailaren 12an. Hain zuzen, hitzarmen horren eskutik digitalizatu dira Hegats aldizkariaren zenbaki guztiak. Honela, egitasmo honi esker, hamarkadetan zehar paperean argitaratutako lan-multzo oparoa bilduma digital bizi bihurtu da: zenbakiz zenbaki arakatu, artikuluak bilatu eta egileen ibilbidea jarraitu daiteke, dena leku bakarretik.

Egitasmo honekin, Euskaltzaindiak eta Euskal Idazleen Elkarteak euskal literaturaren historia hurbileko ondare garrantzitsu bat jarri dute ikertzaile, ikasle, irakasle, idazle eta irakurle ororen eskura. Liburutegietan eta etxeetako apaletan sakabanatuta zeuden zenbakiak leku bakarrean bildu dira, eta bakoitzaren edukia lehen aldiz arakatu daiteke artikuluz artikulu eta egilez egile.

Atariko orrian aldizkariaren azal guztiak ikusten dira, berrienetik zaharrenera, eta bat hautatzean zenbaki horren fitxa irekitzen da. Fitxan azala, argitalpen-data eta artikulu kopurua agertzen dira, baita aurkibide osoa ere, atalka antolatuta. Aurkibidea ez da zerrenda soil bat: artikulu baten izenburuan klik eginez gero, PDFa zuzenean artikulu hori hasten den orrialdean irekitzen da. Horrela, irakurleak ez du dokumentu osoa arakatu behar nahi duen testua aurkitzeko.

Bilatzaile azkarra

Atariko orrian bilatzaile bat dago, 670 artikuluen artean izenburuaren edo egilearen arabera bilatzeko. Hiru letra idaztearekin batera agertzen dira emaitzak, idatzi ahala eguneratuta, eta azentuak eta letra larriak ez dira kontuan hartzen. Adibidez, “Lizardi” idatzita, izenburuan poeta hori aipatzen duten artikuluak agertzen dira berehala; egile baten izena idatzita, berriz, haren artikuluak.

Aurkibidea: 328 idazle eta itzultzaile

Bildumaren berrikuntza nagusietako bat egileen aurkibidea da. Bertan Hegats-en idatzi edo itzuli duten 328 pertsonak ageri dira, alfabetikoki ordenatuta eta bakoitzak argitaratutako lan kopuruarekin. Letraz letra mugitu daiteke, edo izena idatzi eta zerrenda berehala iragazi.

Egile bakoitzak bere orria du, eta bertan biltzen dira aldizkarian argitaratu dituen artikulu guztiak, zenbakiz zenbaki, itzulpenak eta, hala badagokio, bere liburuei buruz Hegats-en argitaratutako iruzkinak. Aurkibideetan ere egileen eta itzultzaileen izenak klikagarriak dira, eta irakurlea artikulu batetik egile beraren gainerako lanetara igaro daiteke zuzenean.

Hegats aldizkariaren literatur ondarea

Hegats 1989ko abenduan jaio zen, Euskal Idazleen Elkartearen aldizkari gisa, eta harrezkero euskal literaturaren gogoeta, sorkuntza eta kritikarako gune nagusietako bat izan da. Bere orrialdeetan saiakerak, poemak, narrazioak, itzulpenak, elkarrizketak eta liburu-iruzkinak argitaratu dira, euskal idazle eta kritikari belaunaldi askoren ekarpenekin.

Zenbaki askok gai jakin bati eskaini zaizkio: literatur topaketak eta jardunaldiak, haur eta gazte literatura, Alemaniako literatura, Finlandia edo Kurdistan bezalako txosten monografikoak, literatura eta zinema, euskal antzerkia. Beste batzuek idazle eta pentsalari handiak omendu dituzte, hala nola Arnaud Oihenart, Lizardi, Jon Mirande, Joxe Azurmendi, Xabier Lete eta Txillardegi.

 

Euskaltzaindia: hemen